‘சினிமாவில் கமிஷன் கலாச்சாரத்தை ஒழிக்க வேண்டும்’ – ரெட் லேபில் தயாரிப்பாளர் லெனின் ஆவேசப் பேச்சு!
ரெட் லேபில்’ திரைப்படத்தின் பத்திரிகையாளர் சந்திப்பில், அந்தப் படத்தின் தயாரிப்பாளரும் நாயகனுமான லெனின் திரையுலகில் நிலவும் கமிஷன் கலாச்சாரம் மற்றும் படப்பிடிப்புத் தளத்தில் ஏற்பட்ட சவால்கள்குறித்து ஆவேசமாகப் பேசியுள்ளார்.
ரெவ்ஜென் பிலிம் பேக்டரி சார்பில் லெனின் தயாரித்து, கதாநாயகனாக நடித்துள்ள திரைப்படம் ‘ரெட் லேபில்’. கே.ஆர். வினோத் இயக்கத்தில் உருவாகியுள்ள இப்படம் வரும் பிப்ரவரி 6-ம் தேதி திரைக்கு வரவுள்ளது. இப்படத்தின் பத்திரிகையாளர் சந்திப்பு சென்னையில் நடைபெற்றது. இதில் படக்குழுவினர் கலந்துகொண்டு தங்கள் அனுபவங்களைப் பகிர்ந்து கொண்டனர்.
நிகழ்ச்சியில் பேசிய தயாரிப்பாளர் லெனின், சினிமா துறையில் தான் எதிர்கொண்ட கசப்பான அனுபவங்களை வெளிப்படையாகப் பகிர்ந்து கொண்டார்:
“நான் எதிலும் நேர்மையையும் ஒழுக்கத்தையும் விரும்புபவன். ஆனால் சினிமா துறையில் எதற்கெடுத்தாலும் ‘கமிஷன்’ கேட்கும் போக்கு அதிர்ச்சியளிக்கிறது. ஒரு படத்தின் பட்ஜெட்டில் 10 முதல் 15 சதவீதம் வரை கணக்கில் வராத கமிஷன்களாகவே போய்விடுகிறது. இது ஒழிக்கப்பட வேண்டும்.
படப்பிடிப்பு தொடங்கிய ஆறாவது நாளிலேயே ‘பெப்சி’ (FEFSI) அமைப்பால் சிக்கல் வரும் என்று மிரட்டல்கள் வந்தன. ‘நாங்கள் படப்பிடிப்பை நிறுத்துவோம்’ என்றார்கள். முதலீடு செய்தவன் நான், அவர்கள் எப்படி நிறுத்துவது என்று நானே படப்பிடிப்பை நிறுத்திவிட்டேன்.”
மேலும், பிலிம் சேம்பரில் தலைப்புப் பதிவு செய்வதில் உள்ள நடைமுறை சிக்கல்களைச் சுட்டிக்காட்டிய அவர், கணினி மயமாக்கல் மூலம் இதை எளிமைப்படுத்த தான் இலவசமாக உதவத் தயார் என்றும் தெரிவித்தார்.
சிறந்த தொழில்நுட்பக் கலைஞர்களைத் தேர்ந்தெடுத்ததே இப்படத்தின் பலம் என்று லெனின் குறிப்பிட்டார். கேரள மாநில விருது பெற்ற இசையமைப்பாளர் கைலாஷ் மேனன் மற்றும் தமிழ்நாடு அரசு விருது பெற்ற எடிட்டர் லாரன்ஸ் கிஷோர் ஆகியோர் இப்படத்தில் பணியாற்றியுள்ளனர். நடிகர்களுக்கு முக்கியத்துவம் கொடுப்பதை விட, ஒரு நல்ல கதையையும் தரமான தொழில்நுட்பத்தையும் வழங்குவதே தனது நோக்கம் என அவர் தெரிவித்தார்.
படக்குழுவினரின் கருத்துக்கள்
• இயக்குநர் கே.ஆர். வினோத்: “வளர்ந்து வரும் கலைஞர்களைக் கொண்டு நேர்மையாக உழைத்திருக்கிறோம். இப்படம் ரசிகர்களை ஏமாற்றாது.”
• வசனகர்த்தா பொன் பார்த்திபன்: “2023-ல் தொடங்கிய இந்தப் பயணம், ஒவ்வொரு நாளும் மெருகேறி வந்துள்ளது. திரைக்கதையில் ஒவ்வொரு காட்சிக்கும் ஒரு சங்கிலித் தொடர்பு இருக்கும்.”
• ட்ரீம் வாரியர் பிக்சர்ஸ் குகன்: “இன்றைய சூழலில் கதைதான் ஒரு படத்தின் வெற்றிக்கு ஆதாரம். தியேட்டர்களில் தின்பண்டங்களின் விலை உயர்வால் மக்கள் தரம் மிகுந்த படங்களையே எதிர்பார்க்கிறார்கள். ரெட் லேபில் அந்தத் தரத்தைத் தரும் என நம்புகிறோம்.”
• இயக்குநர் அனுமோகன்: “இன்றைய சினிமாவில் ஹீரோக்களே எல்லாவற்றையும் முடிவு செய்கிறார்கள். ஆனால் இந்தப் படம் முறைப்படி கதைக்கு முக்கியத்துவம் கொடுத்து உருவாக்கப்பட்டுள்ளது.”
மூன்று ஆண்டுகால போராட்டத்திற்குப் பிறகு, பல தடைகளைத் தாண்டி வெளியாகவிருக்கும் ‘ரெட் லேபில்’ திரைப்படம், சினிமா மீதான காதலால் உருவான ஒரு படைப்பு எனப் படக்குழுவினர் நெகிழ்ச்சியுடன் தெரிவித்தனர்.
