“நாளை நமதே” திரைப்பட விமர்சனம்!
தயாரிப்பு மற்றும் இயக்கம் ஸ்ரீ துர்கா கிரியேஷன்ஸ் நிறுவனத்தின் கீழ் வி.ரவிச்சந்திரன் தயாரித்து, வெண்பா கதிரேசன் இயக்கிய திரைப்படம் “நாளை நமதே”. நடிகர்கள் இத்திரைப்படத்தில் மதுமிதா, வேல்முருகன், ராஜலிங்கம், செந்தில் குமார், முருகேசன், மாரிக்கண்ணு, கோவை உமா உள்ளிட்ட பலர் நடித்துள்ளனர்.கதைக்களம் சிவகங்கை மாவட்டத்தில் அமைந்த ஒரு கிராம பஞ்சாயத்தில், தேர்தல் ஆணையம் அந்தத் தொகுதியைப் பட்டியலின சமுதாயத்திற்கு ஒதுக்கப்பட்டதாக அறிவிக்கிறது.
இதனைத் தொடர்ந்து, பட்டியலின சமுதாயத்தைச் சேர்ந்த ஒருவர் தலைவர் பதவிக்குப் போட்டியிடுகிறார். ஆனால், இதனை ஏற்க மறுக்கும் மற்றொரு சாதியினர், போட்டியாளரையும் அவருக்கு ஆதரவாக இருந்தவர்களையும் கொலை செய்கின்றனர். இதனால், அந்தக் கிராமத்தில் கலவரம் வெடிக்கிறது.இதன் விளைவாக, அந்தத் தொகுதி மீண்டும் பொதுத் தொகுதியாக அறிவிக்கப்படுகிறது. அடுத்த தேர்தலில் மற்றொரு சாதியைச் சேர்ந்தவர் வெற்றி பெற்று, 15 ஆண்டுகளாகத் தலைவராக இருந்து வருகிறார்.
ஆனால், இந்தக் காலகட்டத்தில் தொகுதியில் எவ்வித வளர்ச்சியும் ஏற்படவில்லை. இதனால், மீண்டும் அந்தத் தொகுதி பட்டியலின சமுதாயத்திற்கு ஒதுக்கப்படுகிறது.கதையின் மையம் 15 ஆண்டுகளுக்கு முன் நடந்த உயிரிழப்பு சம்பவத்தால், பட்டியலின சமுதாயத்தைச் சேர்ந்தவர்கள் தேர்தலில் போட்டியிட முன்வராத நிலையில், மற்றொரு சாதியைச் சேர்ந்தவர், பட்டியலின சமுதாயத்தைச் சேர்ந்த ஒருவரைப் பெயரளவில் போட்டியிட வைத்து, தாமே உண்மையான அதிகாரத்தைக் கையில் வைத்திருக்க முயல்கிறார். இந்நிலையில், பட்டியலின சமுதாயத்தைச் சேர்ந்த நாயகி மதுமிதா திடீரெனத் தேர்தலில் போட்டியிட முடிவு செய்கிறார்.இதனால் கோபமடையும் மற்ற சாதியினர், மதுமிதாவையும் அவரது குடும்பத்தினரையும் கொலை மிரட்டல் விடுத்து, பல தொல்லைகளை அளிக்கின்றனர். இந்தச் சவால்களை மீறி மதுமிதா தேர்தலில் போட்டியிட்டாரா? வெற்றி பெற்றாரா? தேர்தல் நடைபெற்றதா? என்பது படத்தின் மீதிக்கதை.
நடிப்பு நாயகி மதுமிதா, தனது கதாபாத்திரத்திற்கு ஏற்ற முகபாவனை, உடல்மொழி மற்றும் கண்களால் உணர்வுகளை வெளிப்படுத்தும் சிறப்பான நடிப்பை வழங்கியுள்ளார். வேல்முருகன், ராஜலிங்கம், செந்தில் குமார், முருகேசன், மாரிக்கண்ணு, கோவை உமா ஆகியோர் தத்தமது கதாபாத்திரங்களுக்கு உயிர் கொடுத்து, இயல்பான நடிப்பை வெளிப்படுத்தியுள்ளனர்.தொழில்நுட்ப அம்சங்கள் ஒளிப்பதிவாளர் பிரவீணின் கேமரா பணி, ஒரு உண்மைச் சம்பவத்தை நேரில் பார்ப்பது போன்ற அனுபவத்தை வழங்குகிறது.
இசையமைப்பாளர் வி.ஜி.ஹரிகிருஷ்ணனின் பாடல்களும், பின்னணி இசையும் படத்திற்கு கூடுதல் பலம் சேர்க்கின்றன.இயக்கம் மற்றும் செய்தி இயக்குனர் வெண்பா கதிரேசன், பட்டியலின சமுதாயத்திற்கு கிடைக்க வேண்டிய அரசியல் அதிகாரத்தைத் தட்டிப்பறிக்கும் அதிகார வர்க்கத்தையும், அவர்களுக்குத் துணைநிற்கும் அரசு அதிகாரிகளையும் அழுத்தமாக விமர்சிக்கிறார். மொத்தத்தில் “நாளை நமதே” ஒரு அழுத்தமான அரசியல் கருத்தை, சமூக நீதியை மையப்படுத்தி, ஆழமான தாக்கத்தை ஏற்படுத்தும் படைப்பாக அமைந்துள்ளது.
நிருபர்: ஜெ.துரை
